By Laerskool Die Arend gaan dit oor elke leerder in die skool.  Ons besef dat nie almal in die eerste rugby- , netbal- óf atletiekspan opgeneem sal word nie.  Elke leerder in die skool moet kwaliteit onderrig ontvang.  Elke leerling in die skool wil regverdig behandel word.  Elke leerder in die skool wil gelukkig wees.  Daarom streef ons daarna om bekend te staan as die “omgeeskool”.  Die skool wat daarna streef om elke leerder ‘n regverdige kans te gun om hom- óf haarself te kan wees.

By Laerskool Die Arend is daar plek vir almal.  Of jy nou rugby óf netbal speel óf dalk presteer op akademiese gebied.  Dalk is jy iemand wat ‘n bietjie gaan sukkel met die werk.  Dalk is jy iemand wat nog maar skaam is en onseker voel as jy ver van Mamma of Pappa is.  Dalk is jy Mamma of Pappa se eerste kleinding wat moet skool toe.  Miskien is jy gelukkig en daar is ‘n ouboet of ousus wat klaar ‘n Arie is wat jou sommer vinnig gaan help.  Maak nie saak wie jy is nie, jy is deur ons almal se Skepper Liewe Jesus gemaak.  Jy het ‘n plekkie in ons Arie-nes.

Mnr. G Lange