Welkom Arie kuiken!!

Welkom by ons Gr. R en RR Pre-primêre skool. Ontmoet Arie se 5 maatjies wat al vir jare tuis is by Laerskool Die Arend Pre-primêr en elke dag saam ons speel en leer:

1. Frikkie sorg vir Fisiese ontwikkeling.

Ons hardloop,kruip, rol, spring, klim en speel op ons kleurvolle speelgrond om al ons groot motoriese spiere te ontwikkel. In die klas gebruik juffrou die lekkerste opvoedkundige apparate om ons fyn spiere slim te maak.

2. Eddie kyk mooi na ons Sosiale- en emosionele ontwikkeling.

Van jongs af word die unieke Arie waardes by ons kleuters vasgelê. Ons leer van maniere en goeie gewoontes. Ons Arie kuikens word gemotiveer om uniek te wees en hul persoonlikheid te ontdek. Om maatjies te maak, om ons emosies op ‘n positiewe manier uit druk, met selfvertroue by die hek in te stap, respek en empatie vir ons maats te hê, hulpvaardig teenoor mekaar te wees en almal te aanvaar soos hulle is, leer ons om emosioneel intelligent te wees.

3. Kosie maak seker ons Kognitiewe ontwikkeling is tops.

Konsentrasie, persepsie, geheue en logiese denke is die bepalende faktore van ons kleuters se leervermoë. As ons kognitiewe ontwikkeling sterk is voel leer soos speel!

4. Timmy ontwikkel ons Taalgebruik.

Hierdie skool het nie net lank, lank gelede gehou van stories en gesels nie. Ons is trots op ons taal en gebruik al ons lip-lekker Afrikaanse woorde oral om ons in die klas. Soms gebruik ons dit vir storie lees en ander kere vir rympies, sing, stry en staaltjies van wat by die huis gebeur het.

5. Bobbie weet dat Fantasie spel ons kreatief maak.

Om ons speel-speel te verbeel is die lekkerste in die klas. Ons leer om te bak-en-brou, ons leer om met herwinbare items enige konstruksie te bou. Om kreatief te wees maak soveel deure binne en buite die klaskamer oop. Verbeel jou net…

Die eerste dag is altyd makliker as mens voorbereid is, hier is ‘n paar belangrike stukkies inligting om te onthou.

Daar sal vanaf reeds om 06:00 ‘n personeellid by die skool wees om u kind te ontvang. Let op na die kennisgewingbord by die ingang vir aanwysing na die toesig klas. Die res van die personeel sal teen 07:15 by hul klasse wees om die leerders te ontvang. Omdat dit die roetine en klas funksionering beïnvloed, doen ons ‘n ernstige beroep op u om u kind nie later as 07:45 by die klas af te sien nie. Ons dagprogram begin stiptelik om 07:45 , kleuters wat laat is mis uit op die lekker oggend roetine.

Kleuters wat nie in die naskool-sentrum is nie kan 13:00 by hul klas afgehaal word.

Die Arend beskik oor ‘n baie oulike, bekwame naskool-sentrum. Die koste beloop R660 per kind en sluit middagete en skoolvakansies in. Die naskoolpersoneel hou toesig op die kleuterskool se perseel tot 18:00. Kontak gerus die kantoor vir meer inligting.

Die kleuters kan gemaklike, gewone klere dra wat lekker vuil kan word. Dit is egter baie belangrik om ‘n ekstra stel klere in te pak, ‘n glipsie gebeur so maklik. Maak asseblief seker dat al u kind se klere gemerk is. Indien u die registrasiefooi van R450 betaal het, ontvang u kind deur die loop van die eerste kwartaal ‘n arie-hemp. Arie-hemde kan elke Vrydag saam ‘n lang blou denim en swart tekkies gedra word. Hou ons nuusbrief dop vir alternatiewe reëlings.

U kind se dieet is so belangrik vir sy/haar ontwikkeling. Maak asseblief seker dat hulle ’n gesonde, voedsame ontbyt reeds by die huis eet. Vermy asseblief lekkernye in die kar op pad skool toe. Kospakkies vir pouse kan broodjies, vrugte, jogurt, sap of water bevat. Probeer asseblief sovêr moontlik weg bly van gaskoeldrank, lekkers en skyfies. `Gemorskos` benadeel die kinders se lyfies, dis geneig om een van die grootste oorsake van hiperaktiewe kinders te wees. Die kleuters mag snoepiegeld bring. Snoepie word slegs Vrydae tydens etenstyd verkoop.

Ons maak sover moontlik van ‘n geselsboekie gebruik om heen en weer te kommunikeer. Indien u vrae het of belangrike inligting/reëlings moet deurgee kan dit in die boekie aangeteken word.  Voor in die boekie is daar ‘n koevert, alle gelde (snoepie/bak en brou) moet veilig daarin gebêre word. Maak asseblief gebruik van die opsomming voor in die boek om op datum te bly. Skoolfonds en naskool geld moet asseblief in die kantoor betaal word. Buitemuurse aktiwiteite word ook direk aan die betrokke instansie oorbetaal.

R450 Registrasiefooi

R830 Betaalbaar vanaf 01 Januarie 2020 tot 01 November 2020 (Gewone skool ure 06:00 tot 13:00)

R660 Naskool (Toesig vanaf 13:00 tot 18:00, sluit skoolvakansies en ‘n middagete in)

Laerskool Die Arend

FNB

Tak: Brakpan 250 542

Rekening nr: 6229 5855 327

So lyk ‘n dag in ons Gr.R en RR klasse.

Sodra jy ingeskryf is en reg vir jou eerste dag saam Arie en al die ander maats, het jy hierdie skryfbehoeftes nodig: